|
التغيير موجودٌ دائمًا ويكون إما إيجابيًا أو سلبيًا ... حتى لو كانت هناك بعض الأمور الإيجابية والبعض الآخر سلبية فهو إما سالب أو موجب .... ولا يجوز الخلط بينها وكل البشر يقابلون تغييرات كثيرة في حياتهم .... ففي كل يوم هناك أمورٌ جديدة ..... لكن هناك تغييرات تكون جذرية وكبيرة نوعًا ما ... لدرجة أن نتاج التغيير قد يُكونُ شخصًا جديدًا لا يحمل من شخصه القديم سوى الاسم والذكريات ...!!!! ... نعود إلى قصتنا والتي كانت من انواع التغيير السلبية فما زلت حتى هذه اللحظة أقوم بإصلاح كثير من الأخطاء التي قمت بها ... وأدفع ثمن تهوري واستعجالي .!!! لن أتكلم عن الجوانب السلبية كثيرًأ ..... كالدخان والهمالة والصياعة ...<<<< اوعى تصدقو بمزح :c (14): الجوانب السلبية كانت أغلبها في البيت مشاكل مع الوالد والوالدة ..... وين رحت!؟ وليش!؟ ومتى!؟ وكيف!؟ وأنا كالعادة ما بخبي إجابة ..... وبعمل زي المثل الي بقول "الي بسأل بلاقي جواب" فمثلا بسألوني وين كنت!؟ ... عند فلان .... وزي من سيربح المليون بتطلع مرحلة جديدة .... مين فلان ومين اهلو ومين جيران اهلو!؟ وجلسات تحقيق ..... وعادي مممم ... كمان صرت عصبي ..... وبطل يعجبني اي شي ..... وما بثق بأي انسان إلا بعد فترة ..... وكثير شغلات // نرجع للفصحى // ومن الأشياء التي تغيرت هي هواياتي ... أصبح الكمبيوتر هاجسي الوحيد والنت متعتي المفضلة ... حتى هواياتي القديمة .... تبدلت من الطريقة الكلاسيكية إلى المحوسبة .... وهذا الشيء ساهم في انعزالي عن الآخرين بمسافة ملحوظة ... ولم أهتم بذلك طالما أنني أجد ما أريد عبر الكمبيوتر والجلوس وحيدًا في البيت. هذا ما بخص تلك المرحلة ... ولست أدري ما دفعني للحديث عنها ربما لأنني لم أتكلم عنها من قبل !!! وربما لا مشتت الفكر الآن وكم أرجو أن أجد برّا أرسو إليه |
ممم ... حاسس اني روتيني
فلنبتعد عن مسلسل البؤساء قليلا .. :) ..... نحكي عن المدرسة كان عندي عادات في المدرسة لا تتغير .. وأعني هنا بالمدرسة الصفوف من الاول إلى العاشر ...!!!! *** الطابور الصباحي :: كان موقعي دائمًا في بداية الطابور ... وممنوع ومستحيل واشي من عالم الخيال أني أوقف على الطابور وما أكون الاول ..... واذا كان واحد من طلاب الصف معند وما بدو يخليني ... كنت اروح اوقف الاول على طابور صف ثاني ..... والتمارين الرباضية ما كنت اعملها لانو ما يجيني نفس ... اصلا منيح اذا كنت مطلع ايدي من جيابي ... بس مرات كنت اعملها لما يكون في تمرين حلو زي تمرين الزقفة والنط ..... مش اماما عاليا جانبا اسفل ..... !!! *** الاذاعة المدرسية :: كان دائمًا يختاروني المُقدم ... وكان عندي مقدمة جهزتها من الصف الثالث ... وظليت كل اذاعة احكي فيها لحد العاشر .... كنت حافظها حفظ وما بغير منها حرف .... بس هسه بعرفش كيف نسيتها .... يمكن مكتوبة عندي هون او هون ... بس هي مش هالمقدمة الحلوة ..... بس كانت مقبولة والاهم انها من الصف الثالث .... آخر مرة حكيتها طلع من تمي غبرة .... هههههههه وبما انو فاتحين موضوع الاذاعة ..... اول اذاعة نظمتها بالكامل كانت من الصف الثالث ... بس ما كانت اذاعة مدرسية ..... يمكن كانت اذاعة على مستوى الوطن العربي ..... حطيت فيها 20 طالب .... 2 للقرآن و2 للحديث و3 هل تعلم و3 يعملو نشرة أخبار و2 للشعر و 3 يكتبو عن فلسطين وواحد حكتلو يكتب عن المدرج الروماني و4 عملت فيهم فرقة نشيد ..... وهدول كلهم ما عدا فرقة النشيد كل واحد كان يشتغل لحالو ومجهز فقرة منفصلة عن الآخرين ... ويوم الاذاعة الشباب ما خيبوني وكلهم جاهزين ... بس طبعا كنا مفاعيص صغار ... خطنا ما بنعرف نقرأو والمايك كان تقيل مش عارفين نمسكو هاد غير العجقة ..... المهم رحت انا اعطيتهم مقدمتي الاسطورية بصوتي الي بخلي النايم يصحى (صرااااخ) بعدين صرت اجيب فيهم واحد واحد ..... والي ينعجق ويتلبك ويتردد .... ازيحو على جنب واجيب الي بعدو ...... والي خلا الفوضى هاي تمشي انو مربي الصف هداك اليوم اجا متأخر وقبلها بيوم كان غايب فما عرف بالتجهيزات الخطيرة .... وكل ما بخلص واحد ييجي استاذ الرياضة ... خلصتو ..... احكيلو لا ..... يحكي طيب انهي ..... احكيلو لسه ظايل ناس ...... المهم ما صار الا وكلهم خليتهم يحكو ويلقو وياخدو راحتهم ( من يوم يومي عنيد) وطبعا الشباب في الساحة بتفرجو على "القزعات" (جمعة قزعة وهو القصير) ومبسوطين انو ضاعت عليهم الحصة الاولى ..... ما عدا صف واحد كان عليهم الاولى رياضة ... وحقدو علينا ..!!!!! *** الوقفة على باب الصف :: في الخمس دقايق او العشرة الي بين الحصص كان مكاني على باب الصف .... كيف وليش وعشان ايش ..... خلص متعودين ..... وكنا نتفرج على الي رايح والي جاي بالممر (او الكارادور) وييجي الاستاذ المناوب "ولك فوت انتا واياه" نفوت شوي ونرجع ..... ومرات ينزلنا على المدير .... بس على الفاضي ... قال مدير قال ... روح العب غيرها بس هاي العادة كانت مفيدة أكثر منها سلبية يعني لما ييجي الاستاذ ... بنط ولد من عند الباب اجا الاستاذ ... وفي 3 ثواني بكون كل واحد في مكانو ..... والهدوء يعم المكان .... وهذا الشيء لم يكن ليحدث لولا نظام الانذار المبكر الي كنا نستعملو !!!! مرات اكون لسه واقف على الباب ... فالاستاذ يستغرب اني ما فتت ويسألني "أنا عندكم" ... اروح حاكيلو .... "لااااا مش هسه" .... يروح شوي وبرجع يدخل على الصف .... فبسألني "يوسف !! ليش حكيتلي اني مش عندكم؟" او باي اسلوب تاني .... طبعا ما في جواب احسن من "اذا انتا مش حافظ جدولك انا شو اعملك؟!!!!؟" ههههههههه ... طبعا هاي الشغلة مش مع كل المعلمين!! *** المسابقات :: كنت احاول اشارك بكل المسابقات الي بتصير عنا ... وكانت اغلبها على مستوى المنطقة ... واكثر مشاركاتي كانت بمسابقة المطالعة ، القرآن الكريم ... في المطالعة جبت الاول مرتين بالصف الثالث والرابع ، وبالقرآن ولا مرة جبت احسن من الثالث ... اصلا كانو بعتمدو عنا مبدأ منع تعدد المشاركات عشان اكبر عدد من الطلاب بشارك .... فأنا أكون بمسابقة القرآن احتياط لعدة اسباب اهمها انو دايما مع استاذ الدين مشاكل ... فلما الشب الي بدو يشارك يكون مش جاهز ... ما الهم غير يوسف .... وانا بكون حافظ المقرر من اول .... والتجهيز عندي ما بدو وقت.. ممم نرجع للصف الثالث (صف المغامرات) هديك السنة كان المسؤول عن النشاطات والمسابقات كلها بس استاذ واحد وكان مربي صف اخوي ويظل يناديني باسمو لانو بشبهني (وهو اصغر مني بسنة وطولو قريب مني) فخلاني اشترك في كل المسابقات .... المطالعة والقرآن والشعر والرسم والقصة ... وكان الاستاذ مهتم وساعدني فكانت النتائج الاول في المطالعة كما ذكرنا سابقا ... الثاني في الشعر (بس لاني ما كتبت قصائد من برا المنهاج) ... الثالث في القرآن .... والرسم والقصة ما زبطت فيهم .... وكان تكريم آخر السنة كبييير ... لدرجة انو انا ما كنت قادر احمل الشنطة الي كانت معبية دفاتر واقلام ومصحف وكتب وقرطاسية مشكلّة .... شو بدي فيهم على آخر السنة ... مش عارف!!! مممم .. حكينا عن المسابقات كثير ... اطلع اطلع مممم برضو حكينا عن المدرسة كثير بكفي للآن نشوفكم بعدين ويا الهي ما اكثر الحكي |
اعلانات
فاصل إعلاني [[ ترلم ترلم سؤال لمن مسكَ المايك قبلي!؟ هل أصابكم ذلك الشعور بالجوع وأنتم تسجلون مشاركاتكم هنا هذا ما يحصل معي وبقطع سلسلة أفكاري أكون بصدد كتابة شء معين .... أذهب وأعود فأغيّر رأيي أو تضيع الصيغة من مخيلتي!! أتمنى أن تعطوني الإجابة :c (12): ترلم ترلم ]] لا تنتظروني اليوم غدًا إن شاء الله سيكون لنا لقاء |
نحكي عن الجامعة شوي!! ... من الأشياء التي تدعو للتفائل أنني وصلت لأولى محاضراتي متأخرًأ ... وبصراحة يومها ما كان جاي على بالي غير النوم ... وما كنت أعرف الدكتور ... والي بالآخر طلعت دكتورة ..... وهاد الشكل شايفو من قبل ... بس مش عارف وين ... ولساتني بحاول اتذكر وين شايفها!!! أكيد مش على الراديو ... يوم المطر في عمان كنت بدي اطلع على الجامعة والجو مش معروف هي شمس ولا مطر فجهزت حالي وقبل ما اطلع قلت بدي اشوف ... اذا في نتفة شمس بطلع ... لقيتها معبية غيوم ورحت لبست بلوزة زيادة فوق القميص .... واول ما طلعت من البيت ما لقيتها الا شمست ..... قلت خلص صرنا طالعين وكملت ..... وانا اسال حالي ... اشلحها او لا!! المهم بعد المحاضرة الثانية بدي اروح للمحاضرة الثالثة ... وكل وحدة منهم في مبنى والتنين بعاد عن بعض ... شي مسافة 5 دقايق او اكثر ... وطبعا لقينا الدنيا بتشتي على الخفيف ... فطلعت امشي ومستمتع بالجو الحلو وحكيت منيح الي شتت واللهم زد وبارك ..... ولا ما لحقت اكملها ولا بلش كبس مطر ... ووصلت المحاضرة الثانية غرقان بمعنى الكلمة ومتأخر دخلت على القاعة ومن عدم انتباهي اني رديت السلام على الدكتور باسلوبي (وعندي اسلوب مميز للسلام عليكم والو ... بس مش رسمي بتاتا) فتت بعد ما لمحت انو الدكتور جحرني لانو كان بياخد بالغياب ... وقعدت آخر شي (الدكتور بيقعد الشباب قدام والبنات ورا ... قعدت آخر شي بس ما كان قدامي بنات) وكنت حافظ رقمي وبستنى ينادي عليه واول ما حكاه ما استنيتو يحكي الاسم وعلى طول حكيت نعم (وبصوت عالي كمان) ... الدكتور كمل الاسم وطلع شي تاني وحكا نعم ... وطلعت الارقام متغيرة ... ههههههه .... صرت احكي مع ضحكة "تغيرت الارقام !! اوك" وكل الي حولي يتفرجو ويضحكو ....واكلنا جحرة تانية من الدكتور ..... وجحرة تالتة لما خلص غياب ووقف وشافني قاعد ورا ... ومن نفسو يحكيلي تعال قدام بس شكلو ما كان الو نفس يعلي صوتو .... هع هداك اليوم عدّا بصعوبة ... اول اسبوع في الدوام كان عندي محاضرة في كلية الهندسة ومباني الكلية متاهة بمعنى الكلمة ... فما كنت عارف مكان القاعة .... وسألت شب على بداية المبنى .... حكالي بتطلع الدرج وبعدين من الباب بتروح يسار وبتمشي شوي بعدين يمين بعدين يسار ... بعدين على اليمين وبتظل ماشي للآخر بتلاقي القاعة بوجهك!!! هع هع .... هاد الكلام بعد الفهم .... هو لما حكالي اياه انا ما جمعت من كلامو اشي .... شو يمين شمال ابصر شو ..... المهم طلعت ولفيت شوي وما في حدا اسألو .... كلهم بنات في بنات ... وكان الوقت الصبح بكير ..... وانا بستحي على الآخر :c (1): .... فقلت ما النا الا ندور على القاعة ..... وظليت الفلف لحتى اهتديت لمكان الكنز ..... ومن هان ورايح ما اروح اتوه عن اي قاعة لانو حظي كل قاعاتي بتكون امكنتها في ابعد مكان عن بوابة المبنى ... مش كلهم .. اغلبهم ... وطبعا شغل الهندسة شغال من الاول .... فاول يوم جبت فيه مسطرة T على الجامعة كان كل واحد يشوفني ويكون عندو جرأة شوي "عمارة!؟" طبعا هو يسأل وخمسة وراه بسمعو .. فأنا أجاوب وبكل براءة "لا حاسوب" ... مش عارف ليس كنت اشوف الاحباط بصوتهم وهم يحكو .... "مسطرتك طويلة ما بجيبوها الا العمارة ولونها ملفت" .... طبعا انا اضحك من جوا وانهي المحادثة .... طول المسطرة 80سم يعني مش كثير .... في متر و120سم .... ولون شنتة المسطرة اخضر.. مش ملفت ... بس ابصر الناس كيف بتشوف!!! ... هداك اليوم زهقوني بهالسؤال ..!!! ... موقف اليوم في عنا واجب (homework) على الاوتوكاد لازم نسلمو اليوم .... فمبارح نزلت البرنامج وعملتو وخلصت وحطيتو على الفلاش ..... واول ما خلصت كل اشي انتابني شعور اكيد انو راح انسى الفلاش الصبح ... فرحت رفعتهم على النت ...... والصبح صحيت وطلعت وفعلا نسيت الفلاش ..... وفي المختبر كنت مجهز حالي انو اكتب الرابط على ورقة واسلمو (شوفو التقدم) .... بس منيح انو بالآخر المهندسة أجلت الواجب وزدات عليه!!! ... والله يرحم ايام الابتدائي |
من هنا وهناك
مقتطفات وأنا صف اول كنت احكي للماما مس وللمس ماما كمان وانا صغير كنت لما اخلص اكل أحكي "صدق الله العظيم" من الخشوع ايام الصف السادس كانت وحدة بتعمل فيي مقلب على التلفون فرحت مسحت فيها الارض وطلعت بالآخر عمتي ..... اكلناها!!! ومن الصف الثامن كنت بدي اعمل ايميل على الياهو .... وبعد ما اخلصو اجرب ادخلو ما يزبط اظل اجرب ما يزبط ارجع اعمل واحد تاني وثالث .... ويمنكن عملت سبعة بالآخر زهقت ونسيت الموضوع وبعدين عرفت المشكلة .... كنت لما بدي ادخل اكتب الايميل كامل ?????? [at] yahoo [.] com يعني زي هيك ادخلو ...... والمفروض انو بس ؟؟؟؟؟ عنجد التوافه سبب مشاكل مش طبيعية بس لساتني حاقد على الياهو وما بدخلو الا بالمناسبات بحب كيكة النسكافيه الي بتعملها خالتي وجربت اعملها قبل رمضان خبصت الدنيا .... بس الطعم كان زاكي وانسو موضوع الشكل الي بفتح النفس ..... ما حدا قرّب عليها كنت مبسوط لانو اكلتها لحالي عندي هوابة تجميع القروش في علبة كل ما يوقع تحت ايدي قرش ما بعرف كم هسه فيها بس آخر مرة عديتهم كانو 88 هاد بعد ما سرق اخوي منهم وبدي اكتب على العلبة علبة المليون قرش هع في موضوع بمنتدى ثاني كل ما بدي اموت ضحك بدخل عليه وبقرأو كامل كنت زمان ادخل على المواضيع القديمة بالمنتدى وابحبش فيها والاقي شغلات بتخلي الواحد يبكي من الضحك بس بعد ما انحذف ....!!! الله بعين وعلى سيرة الحذف كان في صندوق الوارد لايميلي تنبيه انو اجاني رسالة خاصة انا بالعادة بحذف هاي الرسائل وبفوت على المنتدى وبقرأ الرسالة بس لما فتت لقيت المنتدى محذوف وما خطرلي اني ارجع للرسائل المحذوفة واشوف مين المرسل على الاقل والعنوان وراحت الايام ومش عارف من مين الرسالة |
شاركوني
|
فاصل اعلاني [[ ترلم ترلم راح اختار العضو الي بعدي بدون مشاورة يعني راح يدب يلاقي اسمو هون بس منعًا للاحراج الي مو جاي على بالو يمسك المايك يخبرني بالعقل ترلم ترلم ]] هذا البرنامج برعاية زين عالم جميل |
In English
It's a crazy moment which you choose to leave my life and go away, there is no reason for that, and no problem in that too losing a friend is like a tree when it lost a flower from one of her branches I lost a flower, but I will never die No need to cry, since the life is going on, since your name is thing of the past Mine |
اسرار
yousef2 يعجبني هذا الاسم جدًأ ويبدو بسيطًأ إن استثنينا الرقم الموجود في نهايته ولكن ... لكل شيءٍ معنى وسأتحدث قليلا عن الرقم بما أنكم لم تسألو عنه فالرقم يشير إلى موضوعين مهمين : التناقض والتضاد (الضد) وسأتحدث عن الضد بداية فالحياة مليئة بالاشياء المتعاكسة والمضادة ولا داعي لطرح الأمثلة وهذا الموضوع إيماني فإذا كان من الشيء اثنان فإن أحدهما سيطغى على الآخر وقد يتبادلان الأدوار أيضًأ وهناك قوانين تحكمها ... بالاضافة لوجود من يتحكم بها والذي يحكم كل هذه الأمور والذي جعلها ضدًأ لابد أن يكون أحدًأ ليس له مثيل ولا نظير ولا ضد هو الحي القيوم الواحد الأحد .... لا إله إلا هو ... وأما التناقض فتقول إحدى النظريات : " كل شيءٍ يسير بخطٍ واحد ولكن يحدث تناقض بوجود مسبب يؤدي إلى حدوث الفعل الآخر" أي أنّ ما يحدث لابد أن يكون تناقض لحدث آخر كان يجب أن يحدث وهذا ما يفند أي كلام عن الصدفة ... لأنه لابد من وجود سبب لحدوث التناقض هذا من ناحية ومن ناحية أخرى فالحياة مليئة بالتناقضات الجميلة أحيانًأ والشعة في أحيانٍ أخرى وجانب ثالث ... من الناحية السلوكية فحياتي مليئة بالتناقض ... وما يعجبني الآن قد لا يعجبني بعد لحظات أو لم يكن كذلك قبل لحظات وهذا التناقض محصور بأمورٍ معينة ... وسأجيب دون سؤال :: بأنني حين عدت للتسجيل مرة أخرى تذكرت أن العراب يحمل نفس الاسم ويُنادى به في المنتدى فـ فضلت تغيير المعرف ... ولم يخطر ببالي وقتها إلا MKGFABO وأما عن معناه ... فهو بالمعنى البسيط .... اسم علمي بحت .... ولن أشرح التفاصيل لأنه تدخل بها الفلسفة وعلم النفس والنجوم والدين .... ولا أظن أن أحدًأ سيفهم ... وشيءٌ آخر لا أعرفه!! هو كيف عرفت سحر بشخصيتي ... رغم عدم مشاركتي هذا ليس سؤالا بقدر ما يكون استغراب |
خواطر ومشاعر
[MEDIA]http://mkgfabo.hostrator.com/Files/Mic/Ashwaq.mp3[/MEDIA] الرابط اقتباس:
طوافٌ يُريح النفوس عبادةٌ تُطهر القلوب دعاء يفرج الكروب قربٌ يزيدُ الإيمان حلاوة ذكرٌ يُرفع به ذُكرنا في عليين عالمٌ آخر من طهارةٍ ونقاء ليس له مثيل ليس له حدود إلى هناك ... كم أرجو أن أعود |
| الساعة الآن 11:38 AM. |
Powered by vBulletin Version 3.8.7
Copyright ©2000 - 2026, Jelsoft Enterprises Ltd
Translation by
Support-ar