[أنين الحزن]

شو قصة محاولات الإنتحار اللي بنسمع عنها كل فترة بالجرايد؟ من بعد محاولة إنتحار جيهان من المبنى المهجور اللى على دوّار الداخلية صار كل واحد مش عاجبة شي يطلع فوق نفس المبنى (قبل ما يتسكر) أو مبنة تاني ليحاول ينتحر.

آخر القصص عن محاولات الأنتحار, محاولة شاب عمرة 24 عام من الإنتحار فوق بناية رام الله سنتر في دوّار الدخلية كمان, والسبب “الهام جداً” اللي دفعوا أنه يحاول ينتحر أنه بطالب بشهادة توجيهي “ناجح” بعد ما رسب عدة مرات, ليكمل دراسة هندسة كمبيوتر في أحدى الجامعات بالبلد.
طيب, حلو كتير, لنفترض “جدلاً” أنه الجماعة ردّوا عليه وأعطوه شهادة توجيهي وكمّل دراسة بالجامعة, وبعد ما تخرج من الجامعة أكيد رح يدوّر على شغل, وأذا ما لاقى شغل رح يحاوّل ينتحر عشان الحكومة تأمن لألو شغل, وبعدين لما ما يلاقي عروس رح يحاول ينتحر, وهيك كل ما يفشل بشي رح تكون محاولة الأنتحار هي أفضل وسيلة للفت النظر, شو هالفشل اللي انتا فيو يا زلمة؟؟؟
معظم حالات محاولات الإنتحار قامت للفت النظر بس لا أكثر, حيث أن من يحاوّل الإنتحار هو أجبن بكثير من أن يقتل نفسة, وبالغالب يتحقق هدفة بلفت نظر الحكومة والإعلام والرأي العام, وهذا هو المطلوب, لذلك بطلب تجاهل هالفئة من الناس اللي بفكروا أنه بقدروا يوّصلوا للي بدهم ياه بالطريقة الرخيصة هاي, بالأضافة الى ما سبق, يجب تشريع قانون يجرّم محاولات الإنتحار, عشان أي شخص يفكر 100 مرة قبل ما ينتحر.

عجبني تعليق في موقع عمّون حوّل نفس الموضوع:

يا جماعة بسيطة خليه يعرف كم تسارع سقوطه من فوق عمارة رام الله سنتر و كم ثانية راح يحتاج حتى يوصل على الارض و اذا عرف خليه يصير مهندس زراعي و اذا ما عرف لا والله احملوه و ارموه من فوق جسر عبدون

دبوس: خبر سار لجميع الأخوة المنتحرين, أبراج بوابة الأردن قربت تخلص, يعني وضعكم رح يصير “زينون” هناك..

اسامة الرمحي