ليش
بتصير معنا اشياء بحياتنا كل يوم كأنه في شخص خفي بيجاكرنا
متل الزلمة الزغير اللي قاعد جوة التلاجة
بيضوي الضو لما نفتح الباب
ما بتسألو نفسكم مثلا
ليش لما توقف على اشارة
و بتشوف الاشارات الصديقة المجاورة نازلة تمرق سيارات بالهبل
و يتحس بالامل و السعادة ترفرف عليك
فانت سيارتك رابع واحدة
يعني مستحيل ما تمر
و بتفتح الاشارة
و لا اللي اول اوحد على الاشارة بتطفي سيارته و بتبطل تشتغل
و لو ما صار هيك
بيقرر بياع الورد انه يمر
و لو ما صار هيك
بتلاقي الاشارة اللي انت عليها بالذات بتمرق 3 سيارات بس
و انت الرابع
و لو المرة الجاي وقفت عالاشارة التانية الل مرقت سيارات البلد
برضه
رح يصير معك هيك
ليش
****
ليش لما يوقع منك غرض تحت طاولة او مكتب و بتنزل لتجيبه
بيكون دايما و ابدا بعيد عن اكتر نقطة بتقدر توصلها ب 2 سم
يعني عند طرف اصابعك
بتملع رقبتك و بتمط ايدك بلا فايدة
لازم تزيح الطاولة او المكتب او الكنباية
*****
ليش
لما تصف ورا سيارات صافة عرضيا
متل الي بيصفوا مثلا عند كريما كريم
و انت بس بدك تنزل تشتري بوظة و ترجع
بتروح بتختار سيارة و بتصف بالطول وراها
دائما و ابدا اي سيارة بتختار تصف وراها
هية الوحيدة اللي صاحبها بيقرر يطلع
و لازم تزيح
*****
ليش
لما تروح تشتري من سوبرماركت
بتيجي تدفع ولا الحساب بينقص خمس قروش عن اللي معك
و بتضطر تفك الخمسينة او العشرينة عشان خمس قروش
طبعا كما هو معلوم الخمسينة او العشرينة عندهم مبدأ
اذا انفكوا بيطيروا
*****
ليــــــــش
لما توقف تستنى الاسانسير
و تضل تكبس (ع اساس هيك بيوصل اسرع
و بعدين بتيأس و بتقرر تطلع عالدرج
و بس تدير ضهرك
و بتبدا تطلع الدرج
ولا الاسانسير بيوصل
في ليشات كتير
و رح تلاحظوها لحالكم
و ترجعوا تقولو ليش
**********
كل سنة و انتو سالمين و رمضان كريم على الجميع
غبت كتير و ما فكرت هيك رح يصير
بس كل ما بعدت كان الرجوع اصعب