[BIMG]http://up3.m5zn.com/photo/2009/5/10/12/s7ui2d6mu.jpg/jpg[/BIMG]
[align=center]كيف أصارحك بحبي .. وإنت يا كيف بتصدقني ؟



الجزء السادس


طلال : انت اللي شفيك ؟ حالك هاليومين مب عاجبني

إلا قول من شهرين شفيك ؟؟ ما تعلمني انا ولد خالتك قبل لا كون رفيقك

صالح : مافيني شي .. بالعكس عادي ؟

طلال : لا تكذب علي انا اعرفك مب (صالح) القبلي .. علمني شي شاغل بالك ؟ عندك مشكله .. قول لي ياخوك يمكن اساعدك ؟

صالح : ممم دامك فتحت السالفه ومصر انك تعرف بقول لك

طلال : واتمنى انك تقول كل شي ما تخش عني اي شي

صالح : شوف (طلال) بصراحه انا احب وحده

طلال بإنفعال : من صجك ؟ ومتى وشلون ؟ وليش ؟ من هاذي ؟ وين شفتها

صالح : ههههههههههه حشى اصبر علي شوي شوي بقول لك السالفه ..

طلال : قووووووول ما فيني صبر

صالح : لا تحن يالعله .. زين تذكر يوم سافرنا في الصيف؟ انا قبلها تعرفت على وحده

وهالوحده غير عن كل البنات .. وقسم بالله يا (طلول) ادخلت قلبي من اول مره

احس فيه شي خلاني غصب احبها بس وشو ؟ مادري

احس هاذي الانسانه اللي ادورها من زمان وكنت اقول لا يمكن .. ما حبها .. انا اتخيل

سافرت .. حاولت اشغل نفسي واروح واجي .. ما فيه فايدة البنت على طول معاي بأفكاري

اكتشفت كل يوم حبي يزيد لها وكل يوم يزيد تقديري واهتمامي فيها بدون شعور

طلال : وانا اشوووف طول الوقت سرحان ومب فاضي .. ولين اكلمك كني اكلم طوفه .. حتى الطوفه بتستحي وبتتكلم

صالح : خسك الله .. انت لو عايش بموقفي والله ما تلومني مع هالوجه الخايس

طلال : زين ومن متى تحبها ؟

صالح : صار لي تقريبا 4 شهور احبها .. وحب من طرف واحد

طلال بصدمة : بل وساكت ؟ ليش ما صارحتها بمشاعرك ؟

صالح : مادري .. ما قلت لها ولا حتى افكر اقول

طلال : افاا ليش ؟؟ يا خي انت تبغي تبط جبدي .. روح صارحها قول لها

صالح : خايف تردني .. خايف يكون فيه احد في حياتها .. خايف ما تتقبلني

طلال : بس بس جب اسكت لا تحط اعذار .. شوف (صالح) بغض النظر عن انك ولد خالتي

بس صدقني محظوظه اللي بتحبك وبتحبها .. راح توفي لها وتخلص لها وانا اعرفك مب يوم او يومين .. ترى عشرة عمر

واعرف اطباعك زين وانت ما حبيت هالبنت إلا لان مشاعرك لها صادقة يعني مب مجرد اعجاب ..

صالح : انزين وبعدين ؟

طلال : وشو وبعدين؟؟؟ .. انت لاااااااازم تصارحها وتتكلم

صالح : (طلول) يعني انا ما فكرت بالمصارحة ؟؟ يا خي فكرت بس عقب استبعدت هالفكره من راسي وقررت ما قول لها

طلال : كيفك انت بتخسرها .. تراها بنت يعني ممكن تروح منك وانت ولا بحاس

صالح : اللي الله كاتبه بيصير ان شاء الله ولو لي نصيب فيها راح اخذه بإذن الله

طلال : الله يوفقك يالغالي .. والله وطلعت عاشق هاااا بو صلووح

صالح : شفت شلون ما ينلام روميوو .. الفال لك يا روميو (عدن) هههههههااااي


،،

أحبك حب لو استوعبه كل هالبشر .. وربي من قوه الحب لا يموتون بالحال !!

،،


ومرت ايام وايام .. و(صالح) ساكت ..

وبيوم من الايام خلاص .. وصل حده وسكت بما فيه الكفايه لين متى؟؟؟

وهو في الشات مع (عليا) كالعاده يسولفون ويضحكون .. بس هالمره ما يرضى عليها بشكل واضح حتى لو السالفه عادية !!

لان اللي في الشات بدوا يمصخونها وهو ما يقدر يقول لها شي .. وحتى لو قال لها على اي اساس يمنعها ؟

حس برغبه ان يسمع صوت (عليا) .. مشتاق له واااااجد ويبغي يسمعه

يبغي يرتاح من داخل .. وهو يسمع صوتها لما تناديه باسمه

فكر يكلمها .. وقال لها على اساس يستأذن منها .. ودق عليها

صالح : (عليا) شخبارج؟

عليا : بخير وانت شلونك ؟

و(عليا) لين الحين تنحرج منه .. بس هو عنده موضوع مهم .. وهي تحاول تكون عادي معاه

صالح : (علويه) ودي اسولف معاج ..

عليا : تفضل (صالح) كاني اسمعك

(صالح) بداخله افكار وشغلات ترده .. خايف ان يطلع هو الوحيد اللي يحبها وهي ما تتقبله

بس كذا مره حاول يلمح لها .. يقول لها

صالح : (عليا) تدرين اني احب وحده ..!

عليا بفضول : منو ؟؟

صالح : وحده حبيتها من اول ما كلمتها

عليا : اممم انزين اعرفها ؟

صالح : اممم ما دري بس هي وحده بصراحه دشت قلبي وقسم بالله اني حبيتها من اول ما كلمتها

عليا : انزين هي تدري بهالحب ؟

صالح : بصراحه لأ

عليا : ليش ما تقول لها ؟

صالح : خايف من رده فعلها

عليا : ليش خايف ؟

صالح : خايف يكون بحياتها شخص ثاني او خايف اقول لها وما تصدقني

عليا : انزين انت تأكد ان ما بحياتها احد وعقب يحلها ألف حلال

صالح : احس ما فيه احد بحياتها بس ساعات احس فيه

عليا : هههههههههههه شلون بعد كذا

صالح بتوتر : ما أدري

عليا : انزين هي تكلمك دوم وتسولف معاك ؟

صالح : دوم تكلمني وتضحك معاي وتتقبل كل شي

عليا : معناه ما فيه احد بحياتها يالذكي

صالح : انزين خايف اصارحها وما تصدقني؟ والله احبها يا (عليا) والله العظيم

عليا : اوووب طلعت عاشق والله يا (صلوح) ..

صالح : لا والله من صجي ياااا لييييييت تعرف بس ما اقدر اقول لها

عليا : لازم تقول لها لااااازم .. لانك تحبها ومب حلو حب من طرف واحد بدون ما تصارح حبيبك

صالح : معاج حق لاني فعلا احبها وكل مره يزيد هالحب وما قدر اتحمل فكره اني احبها وهي ما تدري

عليا : اوكي هي شسمها ؟ كم عمرها؟ وين عرفتها

صالح : عرفتها من النت وعمرها نفس عمرج بس والله احبها ليتني اقدر اقول لها بوجهها انا أحبج يا فلانه

عليا : قول لها والله راح تكون محظوظه ..

صالح : (علويه) اخاف ما تحبني كثر ما حبيتها ؟

عليا : لا تسبق الاحداث يمكن هي تحبك وانت ما تدري .. يمكن نفس مشاعرك الحين

صالح : صح يمكن

عليا : ياا بختهاااا هاذي اللي تحبها كذا .. والله لو لقيت احد يحبني مثلك كان حياتي ونااااسه

صالح : (عليا) انتي طيبه وتستاهلين كل خير وصدقيني فيه ناس يحبونج وميتين فيج بعد

وسكت (صالح) لان بدى يوضح اكثر .. وخايف من رده فعل (عليا) من كلامه

عليا بإستغراب وإحراج : منوو هذول اللي يحبوني ؟؟؟؟؟

صالح يرقع : ههههههههه شدراني بس اكيد فيه

عليا : عياار انت ههههههههههه

صالح : (علويه) والله والله والله وما بعد الله شي .. صج احبها قسم بالله اني اموت فيها واعشقها وافدى التراب اللي تدوسه

عليا : يااااااا حظها والله .. الله يوفقك يالغالي معاها ..

صالح : وياج يالغاليه

عليا : بس والله فيني فضول ابغي اعرفها من هاذي قول لي عنها .. احس فله والله

صالح : انا عارف كل شخص يصيده فضول بهالمواضيع ما لومج .. ان شاء الله بتعرفين مع الايام

عليا : انزين قول لي الحين عاااد

صالح بمزح : يهالفضول اللي ذابحج .. عقابا لج مب قايل ززززين

عليا : (صلوح) امبلى بتقول مب كيفك

صالح : (علوووويه) صدقيني ان شاء الله مع الايام بتعرفين من هاذي البنت اللي اقلبت كياني كله

عليا : اممم اوكي ..

صالح : كنه الوقت تاخر؟؟ الساعه 2 الفجر

عليا : ايه والله كله مني قاعده واسألك

صالح : شسوي فيج تحققين ههههههههه امزح .. بالعكس والله استانست وياج قدرت افضفض شوي

عليا : ههههههههه يعني مب راضي تقول لي ؟

صالح : ههههههههههههه رجعناا؟؟ قلت لج ولا يهمج والله انتي اول وحده بتعرفين

عليا : على خير .. الله يعيني بكره مب قاعده حق المعهد اعرف نفسي

صالح : صج نسيت تصدقين ان عندج معهد خلاص نامي الحين وبقعدج ان شاء الله .. اذا ما فيه ازعاج ..

عليا : المشكلة ما أقعد على صوت التلفون .. انت تعرفني

صالح : هههههههههههه اييييييييه صح جربت قبل ما قعدتي .. يعطيج العافيه يالغاليه

عليا : هههههههههههههههه شنسوي

صالح : خلاص (علويه) بخليج تنامين وان شاء الله بقدرة قادر ينزل عليج الالهام والله يهديج وتقومين للمعهد هههههههههه

عليا : ههههههههههه مع الراس تطنز حضرتك .. انت ما جربت عذابي والله ما اقعد

صالح : يعني لو فجروا قنبله جنب راسج بعد ما تقعدين ؟

عليا : هههههههههه ولا افكر ابطل عيني بعد .. اصلا اللي بيدخل غرفتي بيستانس .. بيبوق على راحته ..

صالح : وووووووول ههههههههههه الله يعينج وتقعدين ان شاء الله بكره .. ومثل ما وعدتج بتعرفين اول وحده

عليا : وووعد بكره بتقول لي ؟؟؟

صالح برهبه : اممم ان شاء الله بشوف ..

عليا : اوكيك خلاص تصبح على خير

صالح : لا تزعلين اوكي؟ من صجي يالله نوم العوافي حطي بالج على نفسج

(عليا) نعسانه لدرجه انها مب واعيه لنفسها

صالح بمزح : شفيهم الجهال يبغون قصه ؟

عليا : هههههههههه ايه يالله قول

صالح : ههههههه يالله نامي ما فيج حيل انتي حق قصه ما قصه .. بليز (علويه) حطي بالج على نفسج تصبحين على خير

عليا : وانت من اهل الخير ..

وسكروا التلفون على اساس ينامون ..

لكن (صالح) ظل يفكر فيها وبصوتها وبطريقتها وشلون بكره يصارحها بحبه لها ؟؟؟ بعشقه ؟؟ بموووته فيها ؟؟؟

متردد .. ما يقدر يشوف (عليا) كذا وما يقول لها احبج .. سرح بخياله بعيد وقال ان شاء الله إذا قلت لها


راح انومها على صوتي ..
وبكون اخر واحد اقول لها تصبحين على خير يا أغلى انسانه بحياتي
وبكون اول واحد يقعدها من نومها ويقول لها صباح الخير يا عمري
بقول لها احبــج .. يا بنيه وحشتيني لان هذا الصج (عليا) دوم توحشني ..


فجأه جاه مسج من (عليا) مكتوب فيه ..!!


،،

الغاليين خلوني انام وانا ما عرفت من هاذي
لا تستانس واجد بكرة بسألك وبتقول لي ..

،،


همس بإبتسامة : ليت اقدر أقول (انتي اللي احبها)؟؟ وانتي الوحيده اللي حبيتج من اول لحظة ..

وظل يفكر طول الليل مب قادر ينام خايف ومتوتر وبنفس الوقت حبه بقلبه يزيد كل لحظة

ونام من تعب التفكير وهو مستانس .. لان حبيبته ترتبط بأفكاره وما تفارق عقله وقلبه ..

،،

أهــواااك والهوى بهالزمن مطلوب .. وأحبــك .. أكثر بعد التغلي والعتاب

كلك حنــااان على القلب مصبوب!! .. وإذا حبــك لي ذنب قلبـــي ما تاب

إنت لملمتني بعد ما كنت بصــوب .. بعــد ما كنـت بين الجماعة والقـــراب

إنت المحبـة وأنا بمحبتـــك أذووووووب .. حتى لو غلطت أشوفك .. صواب!

إنت الجمال وبخفة الــدم موهوب .. إنت لي راحــة وإنت العـــذاب

إنت الزهر ما فيك أي عــذروب .. إنت العـطــر وإنت زين الأطيــاب

إنت كل حياتي يا أغلى محبوب .. لو تجرحني .. يكون الجرح .. طاب ..!!

قلبي وقلبك.. ما هم قلبين وقلوب .. هو قلــب واحد ويجمعنا أحبــاااب !!

وإذا على الحساد ؟ أمرهم مغلـوب .. ما همنا واشــي وحاسد وكذاب

حبك بقلبي من بطن أمـي مكتوب .. وهذا قدرنا جمعنا بدون حسـاب

لو الحب بالمسطرة والقلم محسوب .. كان ما تخرج من مدرسته طلاب!

مزاياك عالية .. وعندي مااا تشـوب .. والله وصوفـــك فاااااقت حد الإعجاب
،،

ونقول نوم العوافي للأثنين النايمين ..

تتوقعون (صالح) .. بيصارحها ولا يظل على سكوته مده اطول ؟


،،

يتبع في الجزء القادم عشان نعرف وش بيصير ..[/align]

__________________

وأحيانا أشعر أن المسافات لا تمثل عائقا أمام مشاعري
فطالما الحب يملأ قلبي
أرى البعيد في متناول يدي
وأرى في الظلام هدوء وسكينة
ولا أشعر بالوحدة رغم أني أجلس بمفردي
والجمال ينشر رونقه وسحره على كل شيء حولي
ولا أشعر بمرور الوقت