الحمد لله .. !!

[المدعي العام]

مش عارف شو (( أقردني )) و رحت فتحت موقع عن الحيوانات و الحشرات و الزواحف .. و قعدت اتفرج و أحضر فيديو ..

والله حمدت الله مليون مرة اني انخلقت بني آدم ..

تخيل تكون صرصور و عم بتقزدر مروح على البيت و ما تشوف الا عنكبوت (( مقلع )) يطلعلك من تحت حجر و يروح ( شامطك ) و لاف حاله عليك و ماكلك .. وانتا لا الك ولا عليك ..

أو تكون فار و قاعد بتشمشم بأمان الله و ما تشوف الا و هالحية سالخيتك ( هواة ) و بالعيتك .. وانتا لسه ما لحقت تعرف شو السولافة ..

أو فرس النبي .. قاعد بتتشمس على فرع شجرة و ما توعى على حالك الا وانتا على لسان ضفدعة ..

أو عصفور نازل تشرب و ما تحس الا و هالتمساح طالعلك ونك بخبر كان ..

تخيل انك سمكة صغيرة .. و طالع طشة بهالمحيط .. و فجأة يطلعلك اخطبوط انتا أصلاً مفكره صخرة .. و ما تشوفه الا راش عليك شغلة ونك صرت بالحلم الجميل ..

أو صوص قاعد بتبحش بالأرض .. و ما تشوف الا و هالبسة ( صالخيتك ) خماسي و حاملتك و فالة فيك ..

الحمد لله .. الحمد لله انه الواحد انخلق بني آدم .. مو ذبانة .. تكون طاير و ما تشوف حالك الا وانتا ملزق على شبكة عنكبوت .. تخيل وضع الدبانة النفسي لما تشوف العنكبوت جاي عليها .. لا و ما بيموتها دغري .. بيخدرها بالأول .. عشان ياكل على رواق ..

و تمساح شمط دب .. و فهد بلع غزال .. و فيل دعس على حية .. و أم 44 أكلت فار ..

يعني سولافة ..

الحمد لله انه الواحد طلع بني آدم .. يعني لو شو ما يصير مع الواحد .. آخرته بيروح على البيت أقل ما فيها ..

بتترجى .. بتفل .. بتضرب .. بتشتكي .. بتتواسط .. يعني بتمشي حالك .. أما لو كنت حرثون .. و هجم علي أناكوندا .. مين بده يتواسطلي ؟؟؟؟؟