خطوات مراجعة دائرة حكومية ..

[المدعي العام]

أنا بصراحة عندي عقدة من الدوائر الحكومية .. و كون شغلي بيتطلب أكون كل يوم موجود بدائرة حكومية شكل .. لاحظت كتير ملاحظات على الناس ..

كيف تراجع احدى الدوائر الحكومية ..

أولاً / نام بكير قبل بيوم .. عشان تصبح "مقنبز" من الصبح

ثانياً / الصبح .. اشرب قهوة .. و أوعا تغسل وجهك .. و ازا كانت الدنيا شتا .. البس فلدة عسكرية كاحتة .. و ازا صيف .. البس بنطلون رياضة و "حفاية" بدها تنقطع ..

ثالثاً/ في التاكسي أو الباص .

و انتا رايح .. ازا ركبت بتاكسي .. اشكي للسايق من الموظفين .. و الدوائر .. و اشرحله شوي عن الروتين الممل .. و اوصف حالتك النفسية .. و احلف أيمان انك صارلك أسبوعين بتراجع الدائرة عشان ختم .. مع انك أول مرة بتوصل هالدائرة .. أما ازا رحت بباص .. اتبع نفس الخطوات مع الراكب على الكرسي يلي جنبك .. ولا تنس أن تعرض اوراقك عليه ..

رابعاً / الوصول ..

أول ما توصل .. طالع أوراقك من جيبتك .. و ابدا اقرأ فيهم على الدرج و انتا طالع .. و تأكد من وجهتك .. عشان ما حدا يرجعك .. و اهجم على الشباك .. و اوعا تصف على الدور .. لأنه عيب ..


خامساً / اتخاذ مكان مناسب ..

أول ما توصل على الشباك .. احكي للشخص يلي واقف على الشباك الجملة التالية .. (( بالله شوي خلينا نسولف مع الزلمة )) ازا بعدلك .. افتح ايدك على الشباك .. و حط أوراقك بالزبط قدام نظارة الموظف .. و اطلب منه يحطلك اياهم على الدور ..

سادساً / اثبات الذات ..

أول ما ياخدو المعاملة منك .. ولع سيجارة .. و خليك ملزق عند الشباك .. و اقعد سولف مع أقرب شخص لألك .. و اشرحله معاناتك .. بالزبط متل ما عملنا مع سايق التاكسي .. و احتج على الأنظمة .. و على الروتين .. و لا تنس أن تأتي على ذكر موضوع الواسطات .. و أنه غيرك كمل معاملته بعشر دقايق .. لأنه عنده واسطة ..

و لازم تثبت ذاتك بالدائرة .. ما تنسى تصيح على الموظف .. و ترفع صوتك عشان الكل يتطلع عليك .. و هدد انك رح تطلع على المدير و تشكيله حالتك ..

سابعاً / مرحلة التعارف

هاي آخر مرحلة تقريباً .. لما ييجي دور معاملتك .. سولف شوي مع الموظف .. يمكن تكتشف أنه عمه درس معك بنفس الصف .. و اشكره .. و قول الآتي : ((يا سيدي بارك الله فيك ، الله يعطيك العافية ، وين أروح هسه .. ؟؟ ))

و بهيك بتكون أنجزت معاملتك .. و خلصت من هالسولافة يلي فضحتنا فيها .. و عزرت على الدنيا